15 November 2005
OPINYON: Nanpayak ya salot
SAYAN INDIO
Mario Karateka
SIKAYORAN wadtan ya manliket ya maniskopita o mamaltog na saratay manok-atap a singa saramay dolakak tan mipadparan dayon manok o ibon, itonda yolatan a bisyo.
No agyo labay ya onkamayat dia o ditad barangayyo so makapataktakot ya sakit a “bird flu”, agyola papateyen tan kakanen iratan a manok-atap ya manlalapu nid biek taew tan ondadapodia labat ed probinsiya tayo pian mangan na sira-sira ditad kapokokan tan kailogan. Mas maoges no sibuaken yo iraya ta ompan diad kataktakot o kabiglara et nasorob day sola-solar yo tan milaok irad iiwien yoran manok, pabo, pato tan ganso ditan Peligron napeketan na samay bayrus (virus) ya nayarin awit daranian manok-atap so kamanokan tayoran iiwien tan no manmamalas-malas tayoni sikatayoran totoo mismo so mansakit na “bird flu” ya sengeg na ipatey tayon magano.
Say kuay pigaran totoo et sayala imay pawit na Dios ya salot ed mundon makasalanan; lorey ka tay kuanda, singa manlapud tagey so manangikamayat na sayan ambelat a sakit, de payak tan ampuputin manok-atap. Ya ombaliw iraya ed milya-milyan distansia, piga-pigaran palpalandey tan kakiewan ya angatagey ed mundo so tekyaben da pian ondapo labat ed Pilipinas tan arom niran bansa. Aga singa impawit a salot, awa?
Say mas makapapaga ni ingen et anggan samay “anti-viral” ya tambal tatawagey Tamiflu et agni asubok a maong no talagan saya et mamaabig na say sakey a manasakit na “bird flu” o “avian flu” ta lanti diad singa anemaplon inaatey lad sayan sakit ed kaplesan diad Asya et agmet naikdan na sayan tambal.
Samay oseltamivir o Tamiflu et kabat labat ya manonaan ya pangontra ed ordinaryo o komon ya influenza (petang) Agni asali no panon kaepektibo iya ed “bird flu”.
Anggaman ontan manlolombaan laray nasyones ya mangorder na Tamiflu ed samay multinasyonal ya kompanyay tambal a Roche ed ilalora lanti a saya labat so nayarin depensara ed sayan sakit – no nasabi-sabi. Diad Pilipinas, kaermenan ya anggaponi so suplay tayod saya anggad natan ta say inorder nen Sekretaryo na Abig Laman Francisco Duque (a kabaleyan tayo) ed Roche et abeteni na onsoblay a taon insan naideliber da. Siyempre, manonaan ya makala iray baleg a bansa a singa say Estados Unidos tan diad Yuropa ta mas maimpluwensia tan mayayaman ira.
Sikatayo, legan a mana-alagar,et salien tila itay tagumbaw tan oregano ya tanaman ed kaliber-liber tan kapasolan insan tekepay masimoon ya pikasid Aman Manamalsa tan Managtambal.
Osto, Mama Kabog?
* * * * *
Pigaran kakaibad Medya so mapaga la lapud ni, nantotombokan ed loob labat na limara o anemiran agew, ya abakbaktar iray taloran managpalapag ed Pangasinan. Inggapo nen Nap Donato na Home Cable tan Sunday Punch, sinmoblay si Cuya Max ‘Tartariwa’ Mendiguarin na Sunday Punch met insan si Dominic ‘Dong’ Villafuerte.
Mankebyew laray walad Media ta singa wala konoy malas ya sinmabid sektor da.
Tepet nen Nana Eva Visperas ed teks tod si Ama Behn: “Panon tayon napatonda so onian senyales ed Medya?”
Galaw toniay malorey ya Ama Behn: Imiyembro yoran amin ed Patrima ta dia labat so kilalaban.
Balet biig so lorey, nepeg amon mangala so olopay Medya na adbayser (adviser) dan doktor o siopaman ya ekspertod abig-laman laotla saray “stress management experts” parad saray mamalangwerni o “middle age” iran miyembro tan say “geriatrician” parad saray mamatakkenla.
Nen imbebeneg kasi, oonaen so panpaseminar ed panagpaltog (gun handling) amta anggapometniray papateyen iran managpalapag dia; anggad panagtaktakot labat. Abayagmetlan tuloy imay impamatey ed si Ermin Garcia, Sr.
Siopaman so onsoblay ya mangidaulo na Medya dia, ikdantoy imano iyan suhestiyon komon. Mas praktikal – nen say satay pan-aral na pangablit na gatilyoy paltog.
Antoy kuanyodtan, Mama Bernie, Cuya Alex, Ama Rudy, Atchi Susan tan Aromnira?
Mario Karateka
SIKAYORAN wadtan ya manliket ya maniskopita o mamaltog na saratay manok-atap a singa saramay dolakak tan mipadparan dayon manok o ibon, itonda yolatan a bisyo.
No agyo labay ya onkamayat dia o ditad barangayyo so makapataktakot ya sakit a “bird flu”, agyola papateyen tan kakanen iratan a manok-atap ya manlalapu nid biek taew tan ondadapodia labat ed probinsiya tayo pian mangan na sira-sira ditad kapokokan tan kailogan. Mas maoges no sibuaken yo iraya ta ompan diad kataktakot o kabiglara et nasorob day sola-solar yo tan milaok irad iiwien yoran manok, pabo, pato tan ganso ditan Peligron napeketan na samay bayrus (virus) ya nayarin awit daranian manok-atap so kamanokan tayoran iiwien tan no manmamalas-malas tayoni sikatayoran totoo mismo so mansakit na “bird flu” ya sengeg na ipatey tayon magano.
Say kuay pigaran totoo et sayala imay pawit na Dios ya salot ed mundon makasalanan; lorey ka tay kuanda, singa manlapud tagey so manangikamayat na sayan ambelat a sakit, de payak tan ampuputin manok-atap. Ya ombaliw iraya ed milya-milyan distansia, piga-pigaran palpalandey tan kakiewan ya angatagey ed mundo so tekyaben da pian ondapo labat ed Pilipinas tan arom niran bansa. Aga singa impawit a salot, awa?
Say mas makapapaga ni ingen et anggan samay “anti-viral” ya tambal tatawagey Tamiflu et agni asubok a maong no talagan saya et mamaabig na say sakey a manasakit na “bird flu” o “avian flu” ta lanti diad singa anemaplon inaatey lad sayan sakit ed kaplesan diad Asya et agmet naikdan na sayan tambal.
Samay oseltamivir o Tamiflu et kabat labat ya manonaan ya pangontra ed ordinaryo o komon ya influenza (petang) Agni asali no panon kaepektibo iya ed “bird flu”.
Anggaman ontan manlolombaan laray nasyones ya mangorder na Tamiflu ed samay multinasyonal ya kompanyay tambal a Roche ed ilalora lanti a saya labat so nayarin depensara ed sayan sakit – no nasabi-sabi. Diad Pilipinas, kaermenan ya anggaponi so suplay tayod saya anggad natan ta say inorder nen Sekretaryo na Abig Laman Francisco Duque (a kabaleyan tayo) ed Roche et abeteni na onsoblay a taon insan naideliber da. Siyempre, manonaan ya makala iray baleg a bansa a singa say Estados Unidos tan diad Yuropa ta mas maimpluwensia tan mayayaman ira.
Sikatayo, legan a mana-alagar,et salien tila itay tagumbaw tan oregano ya tanaman ed kaliber-liber tan kapasolan insan tekepay masimoon ya pikasid Aman Manamalsa tan Managtambal.
Osto, Mama Kabog?
* * * * *
Pigaran kakaibad Medya so mapaga la lapud ni, nantotombokan ed loob labat na limara o anemiran agew, ya abakbaktar iray taloran managpalapag ed Pangasinan. Inggapo nen Nap Donato na Home Cable tan Sunday Punch, sinmoblay si Cuya Max ‘Tartariwa’ Mendiguarin na Sunday Punch met insan si Dominic ‘Dong’ Villafuerte.
Mankebyew laray walad Media ta singa wala konoy malas ya sinmabid sektor da.
Tepet nen Nana Eva Visperas ed teks tod si Ama Behn: “Panon tayon napatonda so onian senyales ed Medya?”
Galaw toniay malorey ya Ama Behn: Imiyembro yoran amin ed Patrima ta dia labat so kilalaban.
Balet biig so lorey, nepeg amon mangala so olopay Medya na adbayser (adviser) dan doktor o siopaman ya ekspertod abig-laman laotla saray “stress management experts” parad saray mamalangwerni o “middle age” iran miyembro tan say “geriatrician” parad saray mamatakkenla.
Nen imbebeneg kasi, oonaen so panpaseminar ed panagpaltog (gun handling) amta anggapometniray papateyen iran managpalapag dia; anggad panagtaktakot labat. Abayagmetlan tuloy imay impamatey ed si Ermin Garcia, Sr.
Siopaman so onsoblay ya mangidaulo na Medya dia, ikdantoy imano iyan suhestiyon komon. Mas praktikal – nen say satay pan-aral na pangablit na gatilyoy paltog.
Antoy kuanyodtan, Mama Bernie, Cuya Alex, Ama Rudy, Atchi Susan tan Aromnira?
